Kuwa 12 Kanama 2025 abadepite bemeje ishingiro ry’umushinga w’itegeko rigena ingengo y’imari y’umwaka wa 2025/2026. Ni ingengo y’imari ingana na miliyari 7.032Frw. Uyu mushinga w’itegeko wamurikiwe abadepite wari waganiriweho mu nama y’abaminisitiri yo kuwa 09 Kamena 2025; ugaragaza ko ingengo y’imari y’u Rwanda yiyongereyeho 21%, ni miliyari 1,216.1 Frw. Umwaka ubanziriza uyu ingengo y’imari yari miliyari 5,816.4 Frw.

Muri iyi ngengo y’imari ya 2025/2026 amafaranga azava imbere mu gihugu ni miliyari 4.105,2 Frw, inkunga z’amahanga zingana na miliyari 585,2 Frw mu gihe inguzanyo zingana na Miliyari 2.151,9 Frw.

Kimwe mu bikorwa remezo bizashorwamo amafaranga menshi muri uyu mushinga w’ingengo y’imari ni imirimo yo kubaka ikibuga cy’indege mpuzamahanga cya Kigali kiri kubakwa mu Bugesera. Minisitiri w’imari n’igenamigambi, Yussuf Murangwa, ubwo yamurikiraga inteko ishinga amategeko ingengo y’imari y’umwaka wa 2025-2026, yavuze ko amafaranga azagenda ku mirimo yo kubaka icyi kibuga cy’indege mu ngengo y’imari ya 2025-26, angana na Miliyari 853,6Frw.

N’ubwo mu myaka 10 ishize ingengo y’imari y’u Rwanda yagiye yiyongera buri mwaka, Muri uyu mwaka w’ingengo y’imari ni bwo bwa mbere inyongera ku ngengo y’imari ugereranyije n’umwaka wari wabanje yarenze miliyari 1.000 Frw.

Dore uko ingengo y’imari y’u Rwanda yagiye yiyongera mu myaka 10 ishize:

Mu mwaka wa 2014/2015 ingengo y’imari y’u Rwanda yari miliyari 1,768.2 Frw.

Mu mwaka wa 2015/2016 ingengo y’imari y’u Rwanda yiyongereyeho miliyari 40.6 Frw , igera kuri miliyari 1,808.8 Frw.

Mu mwaka wa 2016/2017 ingengo y’imari y’u Rwanda yiyongereye ho miliyari 140,6 Frw, igera kuri miliyari 1,948.4 Frw.

Mu mwaka wa 2017/2018 ingengo y’imari y’u Rwanda yiyongereyeho miliyari 140.7 Frw, igera kuri miliyari 2,094.9 Frw, ivuguruwe yongerwaho miliyari 20.5 Frw, igera kuri miliyari 2,115.4 Frw.

Mu mwaka wa 2018/2019 ingengo y’imari y’u Rwanda yiyongereyeho miliyari 469.1 Frw, igera kuri miliyari 2,584.5 Frw.

Mu mwaka wa 2019/2020 ingengo y’imari y’u Rwanda yiyongereyeho miliyari 432.6 Frw , igera kuri miliyari 3,017.1 Frw.

Mu mwaka wa 2020/2021 ingengo y’imari y’u Rwanda yiyongereyeho miliyari 447.7 Frw , igera kuri miliyari 3,464.8 Frw.

Mu mwaka wa 2021/2022 ingengo y’imari y’u Rwanda yinyongereyeho miliyari 975.8 Frw, igera kuri 4,440.6 Frw

Mu mwaka wa 2022/2023 ingengo y’imari y’u Rwanda yiyongereyeho miliyari 324.2 Frw , yageze kuri miliyari 4,764.8 Frw

Mu mwaka wa 2023/2024 ingengo y’imari y’u Rwanda yiyongereyeho miliyari 350.8 Frw , igera kuri miliyari 5,115.6 Frw.

Mu mwaka wa 2024/2025 ingengo y’imari y’u Rwanda yinyongereyeho miliyari 700.8 Frw, igera kuri miriyali 5,816.4 Frw.

Muri uyu mwaka w’ingengo y’imari wa 2025/2026 rero izaba yiyongereyeho miliyari 1,216.1 Frw, igere kuri kuri miliyari 7,032.5 Frw.

Kimwe mu bipimo byerekana izamuka ry’ubukungu bw’u Rwanda, ni ubwiyongere bw’ingengo y’imari ikoreshwa buri mwaka. u Rwanda ruteganya umuvuduko w’ubukungu ku kigero cya 7,1% mu 2025 na 7,5% mu 2026 ndetse na 7,4% mu 2027.