Umuyobozi w’ishyaka riharanira Demokarasi ihuza abanyarwanda (PDC) Hon. Agnes Mukabaranga yasabye inzego zifite umuryango mu nshingano kuvugurura uburyo inyigisho zihabwa abagiye kurushinga zitangwamo, hagamijwe kubaka umuryango nyarwanda ushoboye kandi utekanye.
Mu biganiro Minisiteri y’uburinganire n’iterambere ry’umuryango (MIGEPROF) yagiranye n’abahagarariye imitwe ya Politiki bitegurwa n’ihuriro nyunguranabitekerezo ry’imitwe ya Politiki (NFPO) iyi Minisiteri yagaragaje ko umuryango nyarwanda wugarijwe n’ibibazo birimo: inda ziterwa abangavu, umubare munini w’abana bata ishuri, amakimbirane hagati y’abashakanye, …. . Iyi Ministeri igendeye ku bushakashatsi yakoze yagaragaje ko ubusinzi buza ku isonga mu bitera amakimbirane yo mu miryango ku kigero cya 85.8%. Mu gihe izindi mpamvu zitera amakimbirane mu miryango zigaragazwa zirimo: kutagira umwanya wo kuganira hagati y’abashakanye, guharika no gucana inyuma, gukoresha nabi umutungo no gukoresha nabi ikoranabuhanga.
Agendeye ku byagaragajwe na MIGEPROF Perezida wa PDC yagaragaje ko inyigisho zihabwa abagiye kurushinga mu Rwanda kugeza ubu zidahagije. Hon. Mukabaranga yagize ati “Ndifuza ko haba isuzuma ryihariye ku bijyanye no gutegura umuryango. Bariya ba jeunes bakeneye ibirenze ibyo bahabwa na E.S w’umurenge. Byanaba byiza hagiye hafatwa igihe gihagije rwose nkuko hari ibikorwa na Kiriziya,… ariko natwe dukeneye ibirenze ibyo twari dusanzwe dutanga. Twanareba erega imiryango ibanye neza tukayifatiraho ingero zo kwigiraho.”
Umunyamabanga uhoraho muri Minisiteri y’uburinganire n’iterambere ry’umuryango Madame Mireille Batamuliza yemera ko uburyo abagiye kubaka urugo bategurwamo budahagije koko. Yagaragaje ko hari uburyo iyi Minisiteri iri kunoza imiterere “Concept” y’inyigisho zigenerwa abitegura kurushinga hakaba hari ibishobora kuvugururwa mu buryo izi nyigisho zari zisanzwe zitangwamo. Madame Batamuliza kandi yasabye imitwe ya Politiki gushyigikira gahunda za leta zigamije kubaka umuryango ushoboye kandi utekanye. Agasaba ko abayoboke b’imitwe ya Politiki na PDC irimo bagenerwa inyigisho zihoraho zigamije kubaka imiryango.
Iyi ngingo y’imibanire y’abashakanye Nyakubahwa Perezida wa Repubulika Paul Kagame aherutse kuyigarukaho mu masengesho yo gusabira igihugu mu ntangiro za 2026. Aho yasabye inzego zose gushakira hamwe umuti w’ibibazo byo mu miryango bituma ndetse hari abahitamo gutandukana nyamara aribwo bari bagishinga urugo.
